ច្បាប់ស្តីពីការរក្សាចន្លោះសុវត្ថិភាពនៅពេលជែងគ្នាឋិតជាធរមាននៅរដ្ឋវិកថូរៀ។ ប្រសិនបើអ្នកបើកយានយន្ត ឬបើកម៉ូតូ អ្នកត្រូវតែរក្សាគម្លាតជែង 1ម៉ែត្រពីអ្នកជិះកង់នៅក្នុងតំបន់ដែលកំណត់ល្បឿនបើកមិនឱ្យលើសពី 60គ.ម/ម៉ោង និងគម្លាត 1.5ម៉ែត្រក្នុងតំបន់ដែលកំណត់ល្បឿនបើកលើសពី 60គ.ម/ម៉ោង។
ការធ្វើរឿងងាយសាមញ្ញដូចជាការផ្តល់គម្លាតដល់អ្នកជិះកង់អាចធ្វើឲ្យមានភាពខុសគ្នាក្នុងការធានាថាយើងអាចទៅដល់ផ្ទះវិញដោយសុវត្ថិភាពទាំងអស់គ្នា។
តើអ្នកជិះកង់ត្រូវអនុវត្តតាមច្បាប់អ្វីខ្លះ?
- អ្នកជិះកង់ត្រូវគោរពតាមច្បាប់ចរាចរណ៍ដូចគ្នានឹងអ្នកបើកយានយន្តឯទៀតដែរ។
- ច្បាប់អនុញ្ញាតឲ្យអ្នកជិះកង់ជិះទន្ទឹមគ្នាពីរនាក់បាន ដរាបណាគេអាចរក្សាចន្លោះរវាងកង់ទាំងពីរមិនឱ្យលើសពី 1.5ម៉ែត្រ។
- អ្នកជិះកង់អាចធ្វើចរាចរណ៍នៅតាមដងផ្លូវភាគច្រើនបំផុតនៅរដ្ឋវិកថូរៀ ដូចជាតាមគន្លងរថយន្តក្រុង និងនៅតាមដងផ្លូវដើររួមគ្នា។ អ្នកជិះកង់មិនអាច ជិះតាមផ្លូវល្បឿនលឿនក្នុងក្រុង(freeways) ផ្លូវល្បឿនលឿន ឬតាមដងផ្លូវផ្សេងទៀតដែលមានស្លាកសញ្ញា មិនអនុញ្ញាតឲ្យជិះកង់។ នៅតាមផ្លូវដែលគ្មានការអនុញ្ញាតឲ្យជិះកង់នោះនឹងមានស្លាកសញ្ញាបង្ហាញថា “កង់មិនអាចធ្វើដំណើរហួសពីចំណុចផ្លូវល្បឿនលឿននេះបានទេ លើកលែងតែមានការអនុញ្ញាតប៉ុណ្ណោះ។”
- ប្រសិនបើអ្នកជិះចូលទៅជិតយានយន្តដែលត្រូវបត់ឆ្វេង អ្នកមិនត្រូវជែងខាងឆ្វេងជាដាច់ខាតទេ។ ត្រូវអនុញ្ញាតឲ្យរថយន្តនោះបត់សិនមុននឹងបន្តដំណើរទៅមុខទៀត។
- នៅតាមដងផ្លូវមានតែមួយគន្លងដែលធ្វើដំណើរតាមទិសស្របគ្នា អ្នកត្រូវតែរក្សាចន្លោះឲ្យបានឆ្ងាយដើម្បីសុវត្ថិភាពតាមដែលអាចធ្វើទៅបាន។
- ប្រសិនបើអ្នកកំពុងជិះនៅតាមដងផ្លូវមួយដែលមានពីរគន្លង ឬច្រើនគន្លង អ្នកអាចជិះនៅផ្នែកខាងឆ្វេង ឬផ្នែកកណ្ដាលនៃគន្លងណាមួយ ហើយប្រើគន្លងនៅខាងស្តាំដៃដើម្បីបត់ស្តាំ។
- តាមច្បាប់ការបត់បកក្រោយហៅថា Hook Turn អាចធ្វើបាន នៅគ្រប់ផ្លូវប្រសព្វទាំងអស់ ហើយត្រូវបានលើកទឹកចិត្តចំពោះអ្នកបត់ស្តាំទាំងអស់។
- ត្រូវប្រាកដថាកង់របស់អ្នកបំពាក់ដោយភ្លើងសញ្ញា ជាពិសេសសម្រាប់ការជិះពេលយប់ ឬពេលមានអាកាសធាតុមិនល្អ។ ភ្លើងពណ៌សត្រូវបំពាក់នៅខាងមុខ ហើយភ្លើងពណ៌ក្រហមត្រូវបំពាក់នៅខាងក្រោយ។
- អ្នកអាចជិះកង់លើផ្លូវដើរបាន ប្រសិនបើអ្នកអាយុក្រោម 13ឆ្នាំ ឬជិះអមនរណាម្នាក់មានអាយុក្រោម 13ឆ្នាំ ឬមនុស្សពេញវ័យដែលមានបំពាក់កៅអីកុមារ។ អ្នកក៏អាចជិះកង់នៅផ្លូវដើរបានផងដែរប្រសិនបើអ្នកមានសំបុត្រពេទ្យបញ្ជាក់ថាអ្នកមានពិការភាពដែលធ្វើឲ្យអ្នកមានការលំបាកជិះតាមដងផ្លូវ។
ព័ត៌មានបន្ថែមស្តីពីច្បាប់ និងបទបញ្ញត្តិផ្សេងៗមាននៅលើគេហទំព័រ VicRoads website ។